Matfrø(ð)i 2025 verkstovur

Fiskaverkstova

Sum oyggjafólk hava vit sjógvin í gangifrástøðu, og tí hava vit tey framíhjárættindi at kunna njóta nýveiddan, heilsugóðan sjómat árið runt – um veður og hugur er til tess.

Leygardagin, 1.mars, skipa vit fyri verkstovu við navnframa kokkinum og fiskaseljaranum, Jákupi Sumberg, har vit fara at læra at gagnnýta heilan fisk á øðrvísi hátt. Verkstovan er fyri øll við forvitni og áhuga at koma nærri sjónum og matmentan okkara.

Verkstovudagurin byrjar við vælkomu og morgunkaffi kl. 10.00, og so verður farið í køkin. Royndi og hugagóði kokkurin, sum nú eisini tekst við fiskasølu, Jákup Sumberg, fer at leggja okkum lag á. Fyrst læra luttakararnir at skera heilan fisk, og síðani verður farið í kokkahattin. Dentur er á burðardygga gerandismatgerð, og luttakararnir læra tí at gagnnýta allan fiskin frá høvur til sporl, so lítið og einki matoyðsl er eftir lokna matgerð.

Verkstovan endar við hugnaligari felagsmáltíð, har vit njóta góða sjómatin, og eisinin fáa luttakarnir uppskriftir og okkurt gott heim við til seinni.

Verkstovan verður hildin í stórkøkinum hjá Tekniska skúla í Klaksvík leygardagin, 1.mars, kl. 10.00 – 15.00

Luttøkugjaldið er 400,- við mati og tilfari írokna, og plássið er avmarkað.

MELDA TIL HER

processed-F0820328-3711-4CD9-A110-D76B84D3C5AD (2)

Royking

Leygardagin, 8.mars, skipa vit fyri verkstovu um rávørugóðsking (curing) og royking, og úr Íslandi kemur royndi kokkurin og framleiðarin, Þórhildur Maria Jónsdóttir, at undirvísa (sí kunning um undirvísara niðanfyri).

Íslendarar gera nógv við at roykja mat, t.d. hangikjøt, sum verður roykt við seyðatøð, og Þórhildur fer at greiða okkum frá hesum siðvenjum og mannagongdum. Eisini fáa vit frálæru um tilfar, rávørur og mannagongdir í samband við heita og kalda royking.

Verkstovan er bæði teoretisk og praktisk, t.v.s. at luttakarnar sleppa at royna seg við at roykja ymsar rávørur, so sum kjøt, fisk, rogn og grønmeti.

Verkstovan byrjar við vælkomukaffi kl. 10.00 og vit halda áfram til umleið kl. 17.00. Luttakararnar fáa mat og drekka á degnum, og tíð er somuleiðis sett av til smáir steðgir.

Dagfesting: Leygardagin 8.mars kl.10.00 – 17.00

Staðseting: Stórkøkurin hjá Tekniska skúla í Klaksvík

Luttøkugjald: 550,- við mati og tilfari íroknað.

Þórhildur María er ein royndur íslendskur kokkur, ið hevur arbeitt í matvinnuni í mong ár – bæði sum kokkur í matstovu og sum matframleiðari. Vegna stóra áhugan fyri mati hon verið partur av alskyns verkætlan, íverksetan og og menningarátøkum innan matøkið í Íslandi.

Hon hevur sjálv verið matframleiðari, og tá fekk hon sær serkunnleika í at heittroykja síl ( Arctic char ).

Seinastu árini hevur hon arbeitt sum leiðari á Vörusmiðjan Biopol – ein góðkend framleiðslustøð til smáframleiðarar og bøndur í Skagaströnd í útnyrðingspartinum av Íslandi. Her hevur arbeitt við matundirvísing, -íverkstan og -ráðgeving til íslendskir smáframleiðarar og bøndur.

Þórhildur María var millum stigtakararnar at stovna the Icelandic Association of Small-Scale Food Producers, sum er landsumfevnandi felag fyri smáir matframleiðarar. Í løtuni er hon ráðgevandi nevndarlimur hjá felagnum. Somuleiðis er hon í nevndini hjá Slow Food Reykjavík and Slow Food Nordic, har hon arbeiðir við at styrkja støðuna hjá smáframleiðarum og skapa margfeldið í íslendsku matframleiðsluni.

Í løtuni er Þórhildur í starvi hjá Farskólinn, ið er ein undirvísingardepil fyri vaksnamannaundirvísing, sum bjóðar skeið innan mathandverk og -framleiðslu.

MELDA TIL HER

Vørumenning: Matur sum ferðaminni

Tá vit eru á ferð – tað verið seg í aðrari bygd í Føroyum ella uttanlanda – er tað altíð hugaligt at uppliva staðbundnu smakkirnir og enntá kunna taka teir heimvið at deila við okkara kæru. Maturin er ferðaminni um góðar løtur og vøkur støð, sum fløva hjarta.

Umframt at verða ein smakkgóður háttur at goyma kær ferðaminni, kunnu lítlu matvørurnar eisni vera ein góð inntøka hjá teimum, ið takast við matframleiðslu, t.d. á útoyggj og øðrum smáplássum.

Mánadagin, 10.mars, skipa vit fyri verkstovu um mat sum ferðaminni í Føroyum. Góðskar tú grønmeti og urtir til krukkumat, t.d. saft, sirop ella súltutoy, ella hevur tú aðra matvøru, ið tú ynskir at selja sum ferðaminni til føroyingar og vitjandi uttan úr heimi – so er verkstovan ætlað júst tær.

Stórur áhugi er fyri staðbundnum matvørum – bæði til egna nýtslu heima við hús og sum gáva ella ferðaminni. Á verkstovuni fáa luttakararnir viðkomandi frálæru um handfaring av matvøru, pakking, marknaðarføring og sølu, umframt at pláss at pláss er fyri sparring og spurningum.

Verkstovan verður hildin á Húsarhaldsskúla Føroya í Klaksvík 10. mars kl. 14:00-17:00.

Luttøkugjaldið er 250,- við kaffi íroknað, og plássið er avmarkað.

MELDA TIL HER

Matvørureinføri

Góðkent skeið til øll tykkum, ið arbeiða við matframleiðslu og matgerð, tað verið seg matgerð til vitjandi í egnum heimi (heimablídni), vøruframleiðsla, matgerð í stórkøki (stovnar, sambýli, kantinur) og matgerð á skipum.

Skeiðið fevnir um tveir dagar, har vit byrja kl. 9.00 og enda kl. 15.30.

Frálæra verður givin um bakteriur, vágar, rættar mannagongdir, amboð og persónligt reinføri.

Luttøkugjaldið er 2.200 kr. við mati, tilfari og skeiðsváttan íroknað

MELDA TIL HER

Tari: Ein heilsugóð rávøra

Í sjónum kring Føroyar eru alskyns tarasløg, ið eru góð til matna. Ja tarin hevur so nógvir góðir eginleikar, at hann verður mettur at vera megnakostur (“superfood”).

Á verkstovuni, 10. mai, seta vit sjóneykuna á føroyska mattaran:

Agnes Mols Mortensen, lívfrøðingur og taraserfrøðingur, fer at greiða okkum frá livandi og góðskaðum tarasløgum og vistskipan og burðardygd í náttúruni, og Jóhanna á Tjaldrafløtti, dietistur, fer at fortelja okkum um kostfrøði – hví tarin er heilsugóður – og leggja okkum lag á við leskiligari gerandismatgerð við tara.

Verkstovan endar við hugnaligari felagsmáltíð.

Luttøkugjaldið er 400 kr við mati og tilfari íroknað

Er skeiðið fultteknað ring á Húsarhaldsskúlan 216974 og kom á bíðilista

MELDA TIL HER

Fiskaverkstova

Royking

Vørumenning: Matur sum ferðaminni

Matvørureinføri

Tari: Ein heilsugóð rávøra

Melda til tíðindabræv

Føroyskar heimasíður

Danskar heimasíður