Endamál

HÚSHARHALDSSKÚLI FØROYA

Ein modernaður og kreativur skúli!

Ein innbjóðandi skúli, við nógvum hugnaligum krókum og spennandi rúmum. Eitt heimligt stað, sum angar av nýbakaðum og osar av kreativiteti. Ein skúli har næmingarnir sleppa at útfolda síni skapandi evni, bæði tá tað snýr seg um mat og handverk.

Skúlin vil altíð verða karmur um eina modernaða ungdómsmentan, sum tekur støði í nú’inum og raðfestur hjartarúm og dygd og tekur trivnað, menning og lívsgóðsku í hægsta álvara.

Húsarhaldsskúli Føroya byggir á eina áhugaverda søgu og er ein týðandi mentanarberi í dagsins samfelag. Ein modernaður og kreativur skúli har tað gamla møtir tí nýggja.

Endamálið

Endamálið við skúlanum er at reka Húsarhaldsskúla Føroya innan fyri karmarnar, sum ásettir eru í Løgtingslóg nr. 66 frá 13. mai 1992 um húsarhaldsskúlar.

Skúlin gevur almennandi undirvísing við serligum atliti til heimið og familjuna.

Húsarhaldsskúli Føroya er ein vistarskúli, og tað merkir, at allir næmingar, sum ganga á skúlanum, eisini búgva á skúlanum. Skúlin hevur búpláss fyri 21 næmingum.

Á tí 26 viku langa húsarhaldsskeiðnum er frálæra í lærugreinum sum praktisk matgerð, føðslulæra, vørukunning, orkurokning, kostsamanseting og dygd, brúkaralæra, reinføri, samfelagslæra, fyrstahjálp, brandskeið og eisini verður kunnað um onnur evni í samráð við næmingarnar. Frálæra er eisini í aerobic og drama, og arbeitt verður tvørfakliga við ymiskum verkætlanum. Á hondarbeiðsøkinum er fjølbroyttar lærugreinar t.d. seyming, leður- og skinnarbeiði, brodering, føroysk bond, silkimáling, patchwork o.a.

Tey stytru skeiðini sum HSF heldur í várhálvuni eru vorin ein týðandi táttur í virkseminum hjá skúlanum.

Skipa verður fyri ymiskum hondarbeiðsskeiðum, bæði sum vikuskiftisskeið og sum vikuskeið.

Undirvíst verður í seyming av vestum og buksum til føroyska mannfólkabúnan.

Skeið sum “Heilsugóður matur og handarbeiði” eru afturvendandi tiltøk og skeiðluttakarnir koma úr øllum landinum.

Skúlin hevur fylgt við teimum broytingum, sum hava verið rundan um okkum í samfelagnum. Hann er ein nútímans vistarskúli, har pláss er bæði fyri gentum og dreingjum.

Hentleikar og hølir á skúlanum er umframt kømur til næmingarnar, undirvísingarhøli, uppihaldshøli/stovur, køkur og venjingarrúm.

Ikki skerst burtur, at í mun til tað virksemi ið er, og kundi verið á skúlanum, eru hølisviðurskiftini ikki nøktandi, tí verður arbeitt við víðka teir fysisku karmarnar hjá skúlanum og menna hann framhaldandi.

Eydna og Bjarni Djurholm

Aftaná loknan 10. flokki 2005 fór eldra dótturin, Annika, á Húsarhaldskúlan í Klaksvík.

Heystið og veturin nam hon sær fjølbroyttan kunnleika um matgerð, handarbeiði og aðra viðkomandi teoretiska og praktiska vitan. Umframt at ogna sær góðar almennar førleikar, so menti vistarhaldið samanhald, ábyrgd og virðing, samstundis sum vinaløg blivu knýtt fyri lívið. Sosiala umhvørvið og felagslívið á skúlanum framdi soleiðis gott og mennandi huglag.

Annika hevði tí eitt frálíka gott vetrarskeið á Húsarhaldsskúlanum.

Hon lærdi ein hóp, treivst væl og mentist í umhvørvinum millum virknar næmingar, dugnaligar og fyrikomandi lærarar og starvsfólk. Trý ár seinni, tá yngra dótturin Monika fór úr 10. flokki, slapp hon eisini inn á Húsarhaldsskúlan. Við okkara góðu royndum stuðlaðu vit eisini Moniku at fara til Klaksvíkar, har hon fekk somu góðu úrtøku og upplivingar á skúlanum sum systurin.

Vit kunnu tí sanniliga viðmæla øllum ungum, sum vilja ogna sær undirvísing og lærdóm um matgerð, handaligt arbeiði og menna vinaløg – sum vara fyri lívið, at velja Húsarhaldsskúla Føroya sum góða stigið á leiðini, áðrenn sjøtul verður settur á virknað lívið, verði seg verkligt ella ástøðiligt. Húsarhaldsskúlin lærir næmingarnar bæði at liva og at uppliva.